تورکیه بیلن امریکا قوشمه ایالتلری نینگ اورته سیده گی منبج کیلیشووی حقیده

تحلیل و تیکشیروو 23

تورکیه بیلن امریکا قوشمه ایالتلری نینگ اورته سیده گی منبج کیلیشووی حقیده

تورکیه بیلن امریکا قوشمه ایالتلری نینگ اورته سیده گی منبج کیلیشووی حقیده

آخرگی ییللرده تورکيه و امریکا قوشمه ایالتلری اورته‌سیده بیر نیچه‌ مسأله‌ اوستیدن بحران پیدا بولماقده.  اینیقسه‌ امریکا قوشمه ایالتلری نینگ تورکيه‌ده‌گی 15-جولای فتو تونتروو تشبثی واقعه‌سیدن کیین پینسیلوا‌نيه‌ده‌گی فتو ترور تشکیلاتی رهبری فتح لله‌ گولننی تسلیم قیلمسلیگی و پکک ترور تشکیلاتی نینگ سوريه‌ده‌گی قناتی YPG ترور تشکیلاتینی توغریدن-توغری قوللب-قوّتلب، و حتا اونی اتفاقچی دیب اعلان قیلیشی، ایکّله‌ مملکت اورته‌سیده‌گی مناسبتلرگه زیان ییتکزه باشله‌دی. تورکيه‌ نینگ ینگی تروریزمگه قرشی کوره‌ش ریجه سی دایره‌سیده عملگه آشیرگن «فرات قلقانی» و «زیتون یاله‌سی» عملیاتیگه قوشیمچه‌ آستانه‌ جریانی دایره‌سیده تورک قوراللی کوچلری تامانیدن ادلبده قوریلگن 12 ته نظارت نقطه‌سی، تورکيه‌ نینگ منطقه‌ده‌گی کوچیگه-کوچ قوشگن وضعیتده. تورکيه‌ نینگ «زیتون یاله‌سی» عملیاتی آرقه‌لی YPG ترور تشکیلاتی نینگ اینگ مهم‌ مرکزلریدن بیرینی تروریستلردن تازه‌له‌گنلیگی، تورکيه‌ نینگ کوچینی منبج مسأله‌سیده ینه-ده‌ آرتتیردی.      

(سیاست، اقتصاد و جمعیت تدقیقات بنیادی) یازووچی جا‌ن اجون نینگ موضوعگه دایر ملاحظه‌لرینی اعتبارینگیزگه تقدیم ایته‌میز.

منبج، سوريه انقلابی نینگ بیرینچی ییللریده ایرکین سوريه اوردوسی تامانیدن قولگه کیریتلگن ایدی لیکن 2014-ییلی داعش تامانیدن باسیب آلیندی. کوپ اوتمه‌ی 2016-ییلی ایسه امریکا قوشمه ایالتلری رهبرلیگیده‌گی خلق‌ارا‌ ائتلاف YPG ترور تشکیلاتی نینگ اساسینی تشکیل ایتگن سوريه دیموکرا‌تیک کوچلری بیلن بیرگه‌لیکده منبجگه قرشی عملیات باشله‌تدی. بونگه قرشی تورکيه‌ نینگ اعتراضلری و آگاهلنتیریشلری نتیجه‌سیده امریکا قوشمه ایالتلری تورک تامانیگه داعش ترور تشکیلاتینی منطقه‌دن چیقریلیشی آرتیدن YPG ترور تشکیلاتی اعضالرینی تکرار فرات نینگ شرقیگه اوتکزیش و منطقه‌ نینگ عربلر تامانیدن کنترول آستیگه آلینیشی حقیده وعده‌ بیرگن ایدی. امریکا قوشمه ایالتلری ییتکچیلری نینگ YPG ترور تشکیلاتی نینیگ منبجنی ترک ایتگنلیگی حقیده‌گی بیاناتلریگه قره‌مه‌ی YPG منطقه‌نی ترک ایتمه‌دی. شونینگدیک، امریکا قوشمه ایالتلری تامانیدن منبج اوچون تشکیل ایتیلگن منبج حربي کینگشی YPG تامانیدن فایده‌لنیلماقده. منبج حربي کینگشی رسمي اوله‌راق مستقل تشکیلات صفتیده کورینیشیگه قره‌مه‌ی پی کاکا ترور تشکیلاتی تامانیدن توغریدن-توغری منبجگه اته‌لگن جمیل مظلوم و اسماعیل دیریک تامانیدن باشقه‌ریلماقده. بونگه قوشیمچه‌ صفتیده منطقه‌دن معلومات ترقه‌تگن کوپچیلیک ژورنالیستلر YPG/ PKK ترور تشکیلاتی نینگ منطقه‌ده‌گی مکتبلرده اوز مفکوره‌سینی ترغیب قیله‌یاتگنلیگینی قید ایتماقده. 

منبج اوچون تورکيه‌ نینگ کوچیگه-کوچ قوشگن اینگ مهم‌ عنصرلردن بیری محلي خلق نینگ YPG ترور تشکیلاتی باشقروویدن بیزار بولیشیدیر. چونکه‌ منبجده‌گی YPG ظلمیدن قاچگن مینگلب انسان فرات قلقانی عملیاتی نتیجه‌سیده خوفسیز منطقه‌لرده جان سقله‌ماقده. اوندن تشقری منبجده‌گی قبیله‌لر و محلي خلق YPG ترور تشکیلاتی نینگ، یاشلرنی مجبورن قوراللنتیریب، قییناققه سالیشیگه قرشی بیر نیچه‌ مراتبه نمایش اویوشتیردی. ییرآستیده فعالیت آلیب بارگن و سوءِقصدلر آرقه‌لی YPG ترور تشکیلاتی اعضالرینی اولدیرگن القیام حرکتی منبجده تشکیل تاپیب، بیرینچی فعالیتلرینی هم انه‌ شو ییرده باشله‌دی.

«زیتون یاله‌سی» عملیاتی آرتیدن تورکيه‌ نینگ منبج حقیده‌گی بیاناتلری و تیارگرلیکلری امریکالیک و تورک ییتکچیلر اورته‌سیده دیپلوماتیک اوچره‌شوولرنینگ باشلشیگه یول آچدی. سابق امریکا قوشمه ایالتلری تشقی ایشلر وزیری رکس تیلرسون نینگ تورکيه‌گه بولگن تشریفی دایره‌سیده منبج مسأله‌سیده امریکا قوشمه ایالتلری و تورکيه‌ نینگ کیلیشیب آلیشلیگی اوچون تورکيه و امریکا اورته‌سیده قوشمه‌ گروه تشکیل ایتیلدی. رکس تیلرسون وظیفه‌سیدن چیتلندیریلیشی بیلن جریان بیر مدت توخته‌ب قالیشیگه قره‌مه‌ی مایک پمپیئو نینگ تشقی ایشلر وزیری بولیشی آرتیدن جریان قالگن جاییدن دوام ایتدی. بونینگ نتیجه‌سیده تورکيه و امریکا قوشمه ایالتلری تامانیدن بیرگه‌لیکده انیقلب آلینگن 3 باسقیچلی یول خریطه‌سی بوییچه‌ کیلیشیب آلیندی. مذکور یول خریطه‌سیگه کوره‌ YPG منبجنی ترک ایته‌دی. منبجنی ایسه تورکيه و امریکا قوشمه ایالتلری بیرگه‌لیکده نظارت قیله‌دی. اوندن تشقری منبج نینگ محلي عنصرلری تامانیدن ینگی باشقروو گروهی تشکیل ایتیله‌دی.

تورکيه و امریکا قوشمه ایالتلری نینگ منبج مسأله‌سیده کیلیشیب آلیشی ناتو ترکیبیده‌گی بو ایکّی مملکت اورته‌سیده‌گی بحراننی یینگیللشتیریب، همکارلیگینی آرتتیریشی ممکن. لیکن بیر نیچه‌ نقطه‌ بیلگیلب آلینگن یول خریطه‌سی و اوزارا مناسبتلر اوچون کتّه‌ معما حسابلنه‌دی. چونکه‌ مذکور یول خریطه‌سی یولگه قوییلمه‌گودیک بولسه، توغریراغی، YPG ترور تشکیلاتی اعضالری منبجدن چیقیب کیتمه‌گودیک بولسه اونده اوزارا مناسبتلرده ینگی معمالر توغیله‌دی. اوندن تشقری ایکّله‌ مملکت اورته‌سیده قَیسی تشکیلات و شخصلر نینگ YPG/ PKK ترور تشکیلاتی بیلن علاقه‌سی نینگ بارلیگی مسأله‌سیگه انیقلیک کیریتیلیشی هم مهم‌ معمالردن بیری حسابلنه‌دی. مثلاً، منبج حربي کینگشی امریکا قوشمه ایالتلری نینگ بیاناتلریگه کوره‌ بوتونله‌ی مستقل بولگن حالده فعالیتده توغریدن-توغری قندیل تامانیدن باشقه‌ریلماقده.

ایکّینچی معما ایسه YPG ترور تشکیلاتی نینگ فرات شرقیده‌گی بارلیگی. تورکيه جهتیدن منبجده‌گی یول خریطه‌سی برچه‌ YPG تامانیدن نظارت آستیگه آلینگن منطقه‌لرده یولگه قوییلیشی کیره‌ک. چونکه‌ YPG ترور تشکیلاتی نینگ فرات نینگ شرقیده‌گی بارلیگی هم تورکيه‌ نینگ ملي خوفسیزلیگینی تهدید آستیگه قویماقده. امریکا قوشمه ایالتلری ایسه منبجده یولگه قوییلگن یول خریطه‌سی نینگ فرات نینگ شرقیده هم یولگه قوییلیشیگه قرشی چیقیشی ممکن. اینیقسه‌ سوريه‌ نینگ شرقیده YPG تامانیدن نظارت قیلینگن نفت کانلری جهتیدن امریکا قوشمه ایالتلری بونده‌ی بیر حادثه نی یولگه قوییشنی خواهله‌مسلیگی ممکن.

تورکيه جمهوریتی تشقی ایشلر وزیری مولود چاووش اوغلی بیلن امریکا قوشمه‌ ایالتلری تشقی ایشلر وزیری مایک پمپیئو نینگ منبج مسأله‌سیده کیلیشیب آلگنلیگی، اوزارا مناسبتلر اوچون کتّه‌ امکان یره‌تیشیگه قره‌مه‌ی، یول خریطه‌سی نینگ یولگه قوییلیشی و منبجدن کیینگی اوزارا مناسبتلر اوچون کتّه‌ سیناو بولیب قاله‌دی.

سیاست، اقتصاد و جمعیت تدقیقات بنیادی یازووچی جا‌ن اجون نینگ موضوعگه دایر ملاحظه‌لرینی اعتبارینگیزگه تقدیم ایتدیک.

 


لیبل: تحلیل

علاقه لی ینگی لیکلر