روسیه نینگ لیبیا گه کیریشی ممکن می؟

روسیه نینگ لیبیا گه کیریشی ممکن می؟ سیاسی بیر تحلیل

روسیه نینگ لیبیا گه کیریشی ممکن می؟

آلدینگی لیبیا بیلن علاقه لی متن لریمیزده لیبیا دیالوگ گروپی تامانیدن کیلیشیلیب آلینگن لیبیا سیاسی کیلیشووی باره سیده بحث ایتگن ایدیک. اوشبو کیلیشوو دایره سیده ملی مطابقت حکومتی نینگ میلادی ۲۰۱۶ نچی ییلی اپریل آیی دن باشلب طرابلس ده اوز فعالیت لری نی باشله گن لیگی نی بیلدیرگن ایدیک.  ملی مطابقت حکومتی نی تن آلگن جنگری لرنینگ داعش نی سرت شهری و قالیویرسه اولکه نینگ برچه قسم لریدن چیقریش اوچون اوز عملیات لری نی باشله گن لیگی گه قره مسدن, اوشبو حکومت نینگ حاضرگی کونده هم حاکمیت قوریش بوییچه کتته قیین چیلیک لری نینگ بولگن لیگی نی معلوم قیلگن ایدیک.  اوشبو قیین چیلیک لر نینگ اینگ مهمی ایسه وظیفه سی مدتی نینگ اداغگه ییتگن لیگی گه قره مسدن حالی هم اوز موجودیتی نی دوام ایتتیریتگن طبرق ده گی نماینده لر مجلسیدن عبارت.  نماینده لر مجلسی گه باغلیق حکومت و اونینگ حربی قوماندانی خلیفه حفتر, ملی مطابقت حکومتی نینگ اینگ مهم توسیق لریدن بیری نی تشکیل ایتماقده.  حتی اولکه نینگ شرقیده کونساین کوچی نی آرتیریب باریتگن حفتر, حربی بیر رهبریت قوریش نی هم اویلب باشله گن وضعیتده. 

لیبیا ده بیرلیک نینگ تامین ایتیلیشی گه مانع بولیتگن باشقه بیر فکتور ایسه, لیبیا لیک سیاستچی لر نی بیر یقه دن باش چیقریش گه چقیریتگن چیت اولکه لرنینگ سیاست لری نینگ بیر بیر لری گه اوخشش ایمس لیگی دن عبارت.  حاضرگی کونده لیبیا سیاستی گه جهت بیریش گه حرکت ایتیتگن امریکا قوشمه ایالتلری, انگلستان, فرانسه, ایتالیا, مصر, بیرلشگن عرب امیرلیک لری, سعودی عربستان و حتی ترکیه نینگ هم بیر بیر لری گه اویغون بیر لیبیا سیاستی گه ایگه ایمس لیک لری کورینماقده.  شونده ی قیلیب اوشبو اولکه لرنینگ همه سی نینگ بیر حکومت نی رسمی اوله راق تن آلگن لیک لری گه قره مسدن, هر بیری نینگ لیبیا ده گی فرقلی اکتور لر نی حمایه لیتگن لیک لری کوزگه تشلنماقده.  خودی منه شوو وضعیت نینگ اوزی ایسه لیبیا ده ملی بیر بیر لیک نینگ تامین ایتیلیشی گه مانع بولماقده. 

لیبیا نینگ شرقیده اوز کوچی نی کونساین آرتریب باریتگن حفتر ایسه اوشبو وضعیت دن راضی ایمس.  مصر و بیرلشگن عرب امیرلیک لری نینگ واضح و فرانسه بیلن سعودی عربستان نینگ یاپیق حمایه لری حفتر نینگ اوزی خواهله گن لیگی دیک بیر سیاسی وضعیت نینگ حاکم بولیشی اوچون کافی ایمس دیک کورینماقده. 

حفتر, روسیه نینگ فعال مداخله سی تقدیرده, سوریه ده بولگن لیگی دیک, وضعیت نینگ اوزگره دیگن لیگی گه ایشانماقده.  شوباعث, روسیه نینگ حمایه سی نی کسب ایتیش مقصدی بیلن جاری ییلده ایککی مراتبه روسیه گه سفر قیلدی. 

سونگگی مراتبه قیلگن سفری نینگ اساسی تورتکیسی ایسه, امریکا قوشمه ایالتلریده بولیب اوتگن جمهوررئیس لیگی سیلاو لریده دونالد ترامپ نینگ غلبه قازانگن لیگی دن عبارت بولدی.  ترامپ نینگ, اورته شرق سیاست لری بیلن علاقه لی بیانات لری, همه اسلامی حرکت لر نی تروریست اوله راق بهالنتیرگن لیگی, جنرال السیسی و پوتین نی مقته گن لیگی حفتر نی هم جسارت لنتیریب یوباردی.  حفتر, ترامپ دوریده, امریکا, مصر و روسیه آره سیده اورته شرق بوییچه ینگی بیر همکارلیک نینگ بحث موضوعی بوله دیگن لیگی نی اویله ماقده.  شونده ی قیلیب حفتر بونده ی بیر همکارلیک نینگ بحث موضوعی بولیشی تقدیرده, لیبیاده طبرق حکومتی نینگ ترجیح ایتیله دیگن لیگی گه ایشانماقده.  شوباعث, حفتر, روس لر دن سلاح و حربی تعلیم حمایه سی کسب ایتیش اوچون مسکو گه سفر قیلدی.

مسکو نینگ لیبیا ده گی تمان لرنینگ هر قنده ی بیری نی حمایه ایتیشی تقدیرده, اولکه ده موازنه لرنینگ اوزگریب کیته دیگن لیگی گه تیگیشلی هیچ قنده ی بیر شبهه یوق البته که.  خوب مسکو نینگ بونده ی بیر ایش نی قیلیشی ممکن می؟

سوریه ده گی سیاست لریدن فرقلی بیر شکلده روسیه حاضرگی کون گه قدر لیبیا نینگ ایچکی ایش لری گه اره له شمس لیک گه حرکت ایتیب کیلدی.  شونده ی قیلیب حاضرگی کون گه قدر بیرلشگن ملت لر تشکیلاتی خوف سیزلیک کینگشی ده لیبیا بیلن علاقه لی هیچ بیر قرار نی ویتو قیلمه دی.  عینی دمده سونگگی ایککی ییلده گی لیبیا ینگی لیک لری نی هم حمایه لب کیلدی.  حتی ملی مطابقت حکومتی نی تن آلدی.  بوندن تشقری, حقیقت گه قره گنده, روسیه نینگ حفتر و طبرق حکومتی نی حمایه لیتگن لیگی بیلینماقده.  لیبیا معما سی بوییچه روسیه نینگ فرانسه, مصر و بیرلشگن عرب امیرلیک لری گه اوخشش بیر سیاست آلیب باریتگن لیگی کورینماقده. 

روسیه تشقی ایش لر وزیری سرگی لاوروف بیلن بولیب اوتگن اوچره شوو لری جریانیده حفتر روسیه نینگ حمایه سی نی کسب ایتیش اوچون مشترک دشمن تروریزم فکتوری دن استفاده ایتیش گه حرکت ایتدی.  بیراق, کریملین بونده ی بیر حمایه اوچون رسمی بیانات بیرمه دی.  بیراق, کریملین سوزلاوچیسی, روسیه نینگ لیبیا ده گی بر چه تمان لر بیلن تماسده ایکن لیگی نی بیلدیررایکن, حفتر بیلن بولیب اوتگن اوچره شوو نینگ هم اوشبو فعالیت لرنینگ بیر بولگی دن عبارت ایکن لیگی نی معلوم قیلدی. 

سیلاو کمپاین لری جریانیده ترامپ, لیبیا سیاست لری بوییچه اوباما رهبریتی و هیلاری کلینتن نی تنقید ایتگن ایدی.  عینی دمده دواملی روشده پوتین توغری سیده یخشی گپ لر گپیرگن ترامپ, دولت رهبری ایتیب سیله نیشی تقدیرده, اورته شرق بوییچه روسیه بیلن همکارلیک ایته دیگن لیگی نی بیلدیرگن ایدی.  شوباعث, حفتر نی حمایه لیتگن تامان لر ترامپ نینگ دولت رهبری ایتیب سیلنگن لیگی نی اوز لری اوچون کتته بیر موفقیت اوله راق قبول قیلدی.  اولر, ترامپ نینگ لیبیا توغری سیده السیسی بیلن کیلیشیب آله دیگن لیگی و روسیه نینگ لیبیا نینگ ایچکی ایش لری گه اره له شیشی گه مانع بولمیدیگن لیگی نی اویله ماقده. روسیه نینگ اوشبو اره له شیش فعالیت لری ایسه البته که حفتر و طبرق حکومتی نینگ حمایه له نیشی شکلیده بوله دی. 

روسیه نینگ رسمی بیاناتلری گه قره گنده, حاضرگی کونده مسکو لیبیا ده ملی بیر بیر لیک نینگ تامین ایتیلیشی بوییچه بیرلشگن ملت لر تشکیلاتی نینگ فعالیت لری نی حمایه له ماقده.  بیراق, سوریه تجربه سیده کورینگن لیگی دیک, روسیه خلق ارا مطابقت فکری باره سیده اویلیدیگن بیر اولکه دن عبارت ایمس.  روسیه نینگ, اوز سوز لری نی قبول قیلدیریش اوچون هیچ بیر حرکت دن اوزاق تورمیدیگن لیگی نی سوریه و اوکرائین تجربه سی کورسه تیب بیرگن وضعیتده. 

حاضرگی کونده شمالی افریقا نینگ وضعیتی و غربی اولکه لر نینگ بیر بیر لری گه اویغون بیر سیاست آلیب باریش بوییچه ضعفیتی روسیه نینگ لیبیا نینگ ایچکی ایش لری گه اره له شیشی اوچون زمینه یره تماقده.  بیراق, روسیه امکان لری و کوچی نینگ تشقری سیده بیر حرکت قیلیش نی آرزو ایتمیدی.  قیسقه قیلیب ایتیلگنده روسیه باشقه بیر نرسه آله من دیک, قولیده گی امکانیت نی قولدن بیریش گه طرفدار ایمس.



علاقه لی ینگی لیکلر