Tusk Amerika idaräsen tänqıyt’läde

Donal’d Tusk: “Mondıy duslar bulğanda, doşmanğa ixtıyac yuq”

Tusk Amerika idaräsen tänqıyt’läde

Awrupa Berlege şurası räise Donal’d Tusk Amerika idaräsen häm ilbaşı Donal’d Trampnı tänqıyt’läde. “Mondıy duslar bulğanda, doşmanğa ixtıyac yuq,”-dide ul. Sofiyada AB äğ’zası 28 ilneñ liderları räsmi bulmağan kiçke aşqa cıyıldı. Annan alda Donal’d Tusk jurnalistlar belän söyläşte.

Tusk Awrupa Berlege illäreneñ AQŞnıñ soñğı çordağı säyäsäte qarşısında “berdäm” bulırğa tiyeşlegen assızıqladı. “Qıtaynıñ kütärelüe häm Rusiyäneñ agressiv säyäsätenä tağın ber fenomen östälde: AQŞ idaräseneñ kaprizları,”-dide ul. Şulay uq, Awrupa berlege illäreneñ AQŞnıñ säwdä häm İran belän bäyle säyäsäte xaqında söyläşäçäklären citkerde. Tusk Amerikanıñ qorıç häm alüminiyğa östämä tamojnya salımnarınnan Awrupa Berlegeneñ azat itelüe kiräklegenä basım yasadı.

Räsmi zat AQŞ ilbaşı Donal’d Trampnı tänqıyt’läp şundıy süzlär äytte: “Awrupa aña räxmät äytergä burıçlı. Anıñ yärdäme belän barlıq yalğan xıyallarıbız belän xuşlaştıq. Şunı añladıq: yärdämğä moxtac bulsañ, başta üz-üzeñä yärdäm itärgä tiyeş bulasıñ. Ber yaqtan transatlantik mönäsäbätlärebez däwam itä, ikençe yaqtan yalğız başıbızğa xäräkät itärgä turı kiläçäk oçraqlarğa äzer toruıbız möhim. Bezneñ öçen bu sınaw bulaçaq”.  

 Oçraşuda Könbatış Balkan illäreneñ Awrupa Berlegenä kerü mömkinlege dä qaraldı.



Bäyläneşle xäbärlär