"Sarı jiletlılar" yul radarların bozğan

Alarnıñ yaqınça 60%ın qullanılışsız xälgä kitergännär

"Sarı jiletlılar" yul radarların bozğan

Franśiyä êçke êşlär ministrı Kristof Kastaner “sarı jiletlılar”nıñ berketelgän yul radarlarına zur zarar birüen belderde. Alarnıñ yaqınça 60%ın cimergännär.

Bu xaqta ministr jurnalistlarğa söyläde. Anıñ äytüençä, rizasızlıq çaraları waqıtında 3 meñ 200 yul radarının yartısınnan kübräge bozılğan. Kastaner sośial’ mediada ut törtelgän radarlar yanında foto töşüçelärne kürüen dä äytte. Ul zarar birüçelärgä könnärdän berkönne “yul qazasında ülem” çınbarlığı belän oçraşmawların teläde.

Kastaner “sarı jiletlılar”nıñ atna axırında uzdırılğan çarasında 2 poliśiyä xezmätkären qıynağan boksçı Kristof Dettinger öçen yardam kampaniyäsenä teläktäşlek kürsätüçelärgä dä rizasızlıq belderde. Ul älege 2 iminlek xezmätkäre belän êlemtädä toruın häm alarnıñ çarada qatnaşuçılarğa qarata köç qullanuı turındağı süzlärneñ yalğan buluın söyläde.

2007nçe yılğı Franśiyä çempionı Dettinger öçen oyıştırılğan yärdäm kampaniyäsendä yaqınça 117 meñ yevro cıyıldı.



Bäyläneşle xäbärlär