Yaña Yefäk yulı, êçmä suı häm cirle maşina

Törki dönya xäbärläre 48

Yaña Yefäk yulı, êçmä suı häm cirle maşina

Yaña zur Yefäk yulı 2018 xalıqara säyäxäte

Yaña zur Yefäk yulı 2018 xalıqara säyäxäte Qazaqstan ximayäsendä kiläse yılnıñ aprel’ häm iyün’ ayları aralığında oyıştırılaçaq.

Qazaqstan mädäniyät häm sport ministrlığınıñ mädäniyät häm sänğät departamentı mödire Almaz Nurazxan “Kazmedia” üzägendä ütkärelgän matbuğat oçraşuında Qazaqstan ximayäsendä Pol’şa säyäxätçese häm tikşerenüçese Yatsek Palkeviç citäkläyäçäk “Yaña Yefäk yulı 2018” säyäxäteneñ oyıştırılaçağın äytte.

Qıtaydan başlanaçaq säyäxät yünäleşeneñ Qazaqstan, Qırğızstan, Üzbäkstan, Rusiyä häm Belarustan uzıp, iyün’ ayında Pol’şada tämamlanaçağın assızıqlawçı Nurazxan: "Säyäxät maqsatı – Aziya belän Awrupanı totaştıruçı tarixi Yefäk yulı uzğan illärneñ mädäni bağlanışların añlatu”, - dip belderde.

Nurazxan 33tän kübräk tarixi urınnı üz êçenä aluçı säyäxätkä BMO mäğarif, belem häm mädäniyät oyışması YUNESKOnıñ yärdäm kürsätüen añlattı.

Qazaqstan turizm milli şirkäte idarä şurası başlığı urınbasarı Timur Duysengaliyev ta bıyıl iyün’-sentyabr’ aylarında uzdırılğan Astana EXPO 2017 xalıqara ênergetika yärminkäsennän soñ Qazaqstannıñ barı tik neft’ häm tabiği gaz ile genä tügel, turizm ile bularaq ta dönyağa açıluına iğ’tibarnı yünältte.

Qazaqstannıñ turizm potenśialınıñ çit ildä tanıtıluı cähätennän Yefäk yulı teması kebek köçle çaralarnı qullanaçaqların belderüçe Duysengaliyev: "Çönki Yefäk yulı teması dönya markalarınnan tağın da populyar torışqa äylände. Bu bezneñ öçen möhim häm Yefäk yulınıñ säwdä markası bularaq qullanıluın täêmin itä. Qazaqstan buldıraçaq markalardan berse dä Yefäk yulı bulaçaq”, - dip äytte.

TİKAnıñ Qırğızstanda êçmä suı proyektı

TİKA törki xezmättäşlek häm koordinaśiya agentlığı Qırğızstannıñ tön’yağında Krasnıy Reçka awılınıñ êçü suı ixtıyacın qanäğätländeräçäk proyektnı tämamlap xezmätkä açtı.

Qırğızstan axıska (mesxet) törekläre cämğiyäteneñ teläge nigezendä TİKA Bişkäk programması koordinatorlığı Krasnıy Reçkada 125 yortnıñ su ixtıyacın qanäğätländerü öçen cir astına ber meñ 250 metr ozınlığında töp su torbasın saldı häm awıl mäçete urnaşqan cirlekkä fontan yasattırdı.

Oyıştırılğan açılış tantanasında TİKA başlığı kiñäşçese Qamil Kolabaş, TİKA Bişkäk programması koordinatorı Ali Muslu, Ahıska-mesxet törekläre cämğiyäte idarä şurası äğzaläre, cirle citäkçelek räsmiläre häm küp sanda keşe qatnaştı.

Qor’än Kärimneñ uqıluı belän başlanğan tantanada Kolabaş, TİKA başlığı Särdar Çamnıñ sälamnären citkerep, qırğız xalqı belän sośial’ ölkädä proyektlarnı tormışqa aşırırğa däwam itäçäklärenä basım yasadı.

TİKA proyektlarınıñ awıl xalqına xäyerle buluın teläwçe Kolabaş: "Çişmä-fontan salınğan urında gel bäyräm bulsın”, - dip äytte.

Programma koordinatorı Muslu da TİKAnıñ Qırğızstanda êçü suı proyektlarına bik zur ähämiyät birüen belderde.

Törkiyäneñ üz avtomobile: “Moña härkemneñ ışanuı kiräk”

Törkiyäneñ cirle avtomobilen êşläp çığaraçaq Urtaq kereşü törkemenä kerüçelärneñ berse bulğan “Zorlu Holding” idarä şurası başlığı Äxmät Nazif Zorlu, cirle avtomobil’dä güzäl äyberlärneñ bulaçağına ışanuın belderep: "Moña härkemneñ ışanuı kiräk. Işanmasağız, ber närsä dä bulmıy. Yulğa çıqtıq. “Ya Allah, Bismillah” diyebez. İnşallah, näticäse dä yaxşı bulır”, - dip äytte.

Zorlu ber programma qısalarında kilgän Törkiyäneñ Bursa qalasında “Anadolu” agentlığı xäbärçesenä yasağan açıqlawında şähärneñ avtomobil’ tarmağında üz süzen äytüen assızıqladı.

Törkiyädä êşläp çığarılğan avtomobil’lärneñ 60-70%ınıñ Bursada citeşterelüen belderüçe Zorlu uzğan atnada ütkärelgän "Avtomobil’ oçraşuları” çarasında çit illärdän dä qunaqlarnıñ qatnaşuın häm şuşı çara waqıtında ike yaqlı êş söyläşüläreneñ ütkärelüen äytte.

Cirle avtomobil’ citeşterüendä wazıyfanı üz östenä alırğa äzer buluların assızıqlawçı Zorlu: "Bu konsorśiumda urın aldıq. Bez sänäğättän kilgän törkem. Törkiyädä sänäğättä êş belän täêmin itkän iñ zur törkemnärdän berse. Sänäğättä 30 meñ êşläwçebez bar. İnşallah, ilebez häm törkemebez isemennän xäyerle bulsın,” - dip fikerlären citkerde.

Dön’yada yaña tendenśiyanıñ fosil’ yağulıq bulmağan êlektrlı yaña maşinalar häm keşesez maşinalar buluına basım yasawçı Zorlu “Vestel” firmasınıñ bu ölkädäge öleşen añlattı, “Zorlu Meta Nikel Kobalt” qorılmasın açıp cibärülären belderde häm “Bez bu il öçen härwaqıt bar häm bulırğa däwam itäçäkbez”, - dip basım yasadı.

Çığanaq: trtavaz.com.tr, kaztr.com



Bäyläneşle xäbärlär