Ärdoğannıñ ciñüe häm Törkiyäneñ tışqı säyäsäte

Kön tärtibe 26

Ärdoğannıñ ciñüe häm Törkiyäneñ tışqı säyäsäte

Törkiyä 24nçe iyün’dä İlbaşın da, xalıq ışanıçlıların da sayladı. Näticäne dön’ya cämäğat’çelege zur qızıqsınu belän kötte. Räcäp Tayyip Ärdoğan 52,6% tawış cıyıp berençe turda yaña sistemanıñ täwge ilbaşı bularaq saylandı. Ğadälät häm qalqınu partiyäse belän Millätçe xäräkät firqase tözegän Cömhür ittifağı mäclestäge küpçelekne qazandı.  Törkiyäneñ saylaw näticäläre belän bergä yaña sistemağa küçüe de-fakto tormışqa aştı. İldäge saylawçılarnıñ 87%ı tawış birüdä qatnaştı. Dön’ya cämäğat’çelege dä çaranı zur qızıqsınu belän küzätte. Törkiyädäge saylawlarda Ärdoğannıñ häm Cömhür ittifağınıñ ciñüe tışqı säyäsät öçen dä, terrorçılıq belän köräşkä dä “DÄWAM” diyü belän ber.

Soñğı çorda Törkiyä tışqı säyäsätendä näticäle häm aktiv êşçänlek kürsätä, ilneñ milli mänfäğat’läre yünäleşendä xäräkät itä. Ber yaqtan NATO berlektäşläre, ikençe yaqtan Rusiyä häm İran belän bergä êşläwçe Törkiyä ber ük waqıtta Urta Könçığışta, Balkannarda, Aziyädä häm Afrikada täêsirle tışqı säyäsät alıp bara. Törkiyäneñ näticäle tışqı säyäsäteneñ möhim öleşe – gumanitar yärdäm häm saqlanu sänäğate. Dön’ya külämendä iñ köçle iq’tisadqa iyä illär arasında 13nçe bulğan Törkiyä gumanitar yärdämdä – berençe urında.  İkençedä isä AQŞ - dön’yadağı iñ köçle iqtisadlı däwlät. Törkiyäneñ gumanitar yärdäm êşçänlekläre – anıñ keşegä birgän bäyäseneñ ap-açıq kürsätkeçe.

Başqa yaqtan qarağanda, Törkiyäneñ saqlanu sänäğatendäge sikereşläre – anıñ tışqı säyäsättäge rölen kürsätüçe möhim kürsätkeç. Törkiyäneñ Paqıstana ATAK boralağı satuı, Farsı qultığı illärenä bronetexnika çığaruı häm şul uq waqıtta cirle keşesez hawa apparatların alırğa teläwçelärneñ artuı – Törkiyäneñ texnoloğik qazanışların kürsätä. 24nçe iyün’dä bulğan saylaw näticäläre - Törkiyäneñ, gumanitar yärdäm häm saqlanu sänäğaten dä kertep, tışqı säyäsättäge adımnarın däwam itü öçen yäşel ut birde. Törek xalqı, nigezdä, Somalidağı moxtac keşelärgä yärdäm itügä “DÄWAM” dide.

Törkiyädäge saylaw näticäläre, şulay uq, terrorçılıq belän köräş öçen zur ähämiyätkä iyä. Färat qalqanı xäräkäte belän DEAŞ terrorçı oyışmasın Törkiyä çigennän quğannan soñ, “Zäytün botağı” operaśiyäse belän Afrin töbäge YGS/PKK terrorçı oyışmasınnan çistartıldı. Ğıyraqta baruçı häm PKKnıñ Törkiyägä suzıluçı täêmin itü yulların kisüne, terror oyışmasınıñ märkäze sanaluçı Kandil töbägen tulısınça çistartunı maqsat itep quyğan Qararlılıq xäräkäteneñ saylaw näticälärennän soñ tuqtağan cirennän däwam itäçägen söyli alabız. Törkiyäneñ terrorçılıq belän köräştä iğ’lan itkän yaña doktrinası anı il çikläre eçendä genä qaldırmıy. Tıştan yanawçılarğa da qarşılıq kürsäteläçäk.

Şul qısalarda tormışqa aşqan häm aşuçı 3 xäräkät belän Törkiyädäge terrorçılıq şaqtıy kimede. Maqsat - anıñ çığanağın yuq itep, ildäge terrorçılıqqa bötenläy çik quyu.     

Şul uq waqıtta Törkiyä belän AQŞ bilgelägän yul kartası nigezendä YPG Mänbiç töbägennän kitäçäk häm ike NATO berlektäşe anda urtaq tırışlıq belän iminlek häm cirle üzidarä urnaştıraçaq. Kileşü 24nçe iyün’ saylawlarınnan alda tözelde. Häm Räcäp Tayyip Ärdoğannıñ yaña sistemada täwge ilbaşı bularaq saylanuınnan soñ däwam itä. Şul räweşle, Süriyädäge kiyerenkelekne kimetü häm solıx öçen cirlek xäzerläw maqsatınnan Törkiyä, Rusiyä häm İran garantiyäse belän  başlanğan Astana prośessı da tuqtamıy. İldä saylawdan soñğı bilgesezlek bulmawı häm totrıqlılıqnıñ däwam itüe säyäsättäge barlıq kileşülär öçen uñay.   

 

 Säyäsät, iq’tisad häm ictimağıy tikşerenülär waqıfı belgeçe, yazuçı Can Acun



Bäyläneşle xäbärlär