"Amerika belän iq’tisadi yanawlar artta qaldı"

İlbaşı idaräse süzçese İbrahim Kalın AQŞ belän mönäsäbätlärne açıqladı

"Amerika belän iq’tisadi yanawlar artta qaldı"

İlbaşı idaräse süzçese İbrahim Kalın Süriyä çigendä tözeläçäk imin töbäkneñ kontrole Törkiyädä bulacağın belderde. Bu xaqta ul ministrlar kabinetı cıyılışındağı könüzäk mäs’älälärgä qağılışlı matbuğat cıyılışında söyläde.

İbrahim Kalın AQŞnıñ Süriyädän çığu qararınnan soñ êşlärneñ üz yulında kitüen äytte. “Terrorçılıq belän köräş häm Törkiyägä yanawçı terrorçı oyışmalarına qarşılıq här cirdä däwam itäçäk,”-dide ul.

Kalın Törkiyäneñ yomşaq häm qatı köçeneñ säyäsätneñ häm diplomatiyäneñ barlıq mömkinleklären qullanıp mäydanda da, östäl artında da däwam itäçägen belderde.

Süzçe ilbaşı Räcäp Tayyip Ärdoğannıñ 23nçe ğıynvarda Rusiyäneñ başqalası Mäskäwgä säfär yasaw mömkinlegen dä äytep uzdı. “Ayıruça, AQŞnıñ çığu qararınnan soñ barlıqqa kilgän wäzğıyät’ne Rusiyä belän bergä koordinaśiyäläw maqsatı quyıla. Süriyä dä, başqa ikeyaqlı mäs’älälärne dä urtağa salıp söyläşü mömkinlegebez bulaçaq,”-dip farazladı Kalın.   

Ul, monnan tış, uzğan atnada kilgän AQŞ delegaśiyäse qaldırıp kitkän dokument xaqında söyläde. Anıñ äytüençä, bu 5 maddäle, räsmi bäyläneşe bulmağan, töp rubrikaları belän AQŞnıñ çigenü qararın raslawçı qäğaz’. “Amerika belän iq’tisadi yanawlar artta qaldı. Bügen yaña ber maqsat barlıqqa kilde häm bu pozitif dulqında êşçänlegebezne däwam itäçäkbez. Bezneñ öçen S-400lärne alu belän Patriot raketalarınıñ alınuı arasında hiçber säbäbi êlemtä, bäyläneş, şart yuq,”-dide İbrahim Kalın.  
 



Bäyläneşle xäbärlär