ایران، آلمان ائلچیسینی چاغیردی

بهرام قاسمی، بو گیریشیمین ایرانلا آوروپا ایلیشکیلرینه توطئه قوران گوج‌لرین ایشی اولدوغونو ادعا ائتدی

ایران، آلمان ائلچیسینی چاغیردی

ایران، بیر مدت‌دیر آلمانیادا گؤزآلتیندا‌کی ایران‌لی دیپلوماتین بلژیکه وئریلمه‌سی ایله باغلی اولاراق آلمانیانین تهران‌داکی ائلچیسینی چاغیردی.

ایران خاریجی ایشلر باخانلیغینا عاید اینترنت سایتین‌دان وئریلن معلوماتا گؤره، باخانلیق سؤزچوسو بهرام قاسمی، آلمان ائلچیسی ایله گؤروشمه‌ده ایران‌لی دیپلوماتین آلمانیادا گؤزآلتینا آلینماسی و بلژیکه وئریلمه‌سینه اعتراض ائدیلدیگینی سؤیله‌دی.

سؤزوگئدن گیریشیمین ایرانلا آوروپا ایلیشکیلرینه توطئه قوران گوج‌لرین ایشی اولدوغونو ایر‌لی سوره‌ن قاسمی، اولوسلارآراسی دیپلوماسی حقوقونا اویمایان گیریشیمه سون قویولماسی و ایران‌لی دیپلوماتین اؤلکه‌سینه وئریلمه‌سی لازیم اولدوغونو بیلدیردی.

بلژیک فدرال ساوجیلیغی طرفین‌دن ژوئیه آیین‌دا وئریلن یازیلی آچیقلامادا، پاریس‌ده‌کی بیر کنفرانس سالونون‌دا ایران مخالیفتی ایران مقاومتی میلی شوراسی طرفین‌دن تشکیل اولونان تدبیره سالدیری حاضیرلیغین‌دا اولدوغو شوبهه‌سی ایله بروکسل‌ده ایکی نفرین گؤزآلتینا آلیندیغینی، ایران اصیل‌لی بو ایکی نفرین ارتباط‌دا اولدوغو ایر‌لی سوروله‌ن ایرانین وین ائلچیلیگین‌ده دیپلومات اولدوغو معین ائدیلن اسدالله اسدی آدلی شخصین ایسه آلمانیادا گؤزآلتینا آلیندیغینی بیلدیرمیشدی.

آلمان پلیسینین باواریادا گؤزآلتینا آلدیغی اسدی اوچون بلژیک گئری وئرمه طلب ائتمیشدی.

بروکسل‌ده‌کی باش ساوجیلیغینین طلبینه گئچن هفته مثبت جاواب گلدی، تهران ایسه اتخاملاری رد ائد‌رک قراری قینامیش، دیپلوماتین بوراخیلماسینی طلب ائتمیشدی.



ایلگیلی‌لی خبرلر