تورکیه‌ده یئنی بیر بؤجک نؤوعو تاپیلدی

قیرمیزی گؤزلو بؤجگه اوشاک شهرینه اتحافا "مئگاستیگموس اوشاکئنسیس" آدی وئریلدی

تورکیه‌ده  یئنی بیر بؤجک نؤوعو تاپیلدی

تورکیه‌نین اوشاک شهرینده، آراشدیرماسی یئریدن یوکسک زراعت مهند‌سی اردال زنگین، قوردوغو بؤجک توزاق‌لارین‌دا یئنی بیر بؤجک نؤوعو تاپدی.

توریمیدا فامیلیاسین‌دان ساری رنگ‌لی، ۱.۸۸ میلیمتر بؤیوکلویون‌ده‌کی قیرمیزی گؤزلو بؤجگه اوشاک شهرینه اتحافا "مئگاستیگموس اوشاکئنسیس" آدی وئریلدی.

زنگین، بؤجگی قاریشیق میوه آغاجلارینین اولدوغو بیر باغچاداکی توزاقدا توتدو.

ایلک دفعه گؤردویو بؤجگین شکیللرینی چکه‌رک انتومولوژی ساحه‌سین‌ده ۴۵ ایلدیر چالیشما یئریدن پروفسور دکتر مقداد دوغانلارا گؤندرن اردال زنگین، گؤرولن ایشلرین آردین‌دان یئنی بیر نؤوع معین ائتدیکلرینی آنلادیقلارینی سؤیله‌دی.

حاضیرلادیقلاری مقاله‌نین انتومولوژی و زئوولوژی ساحه‌سین‌ده تانینمیش مونیس انتومولوژی زئوولوژی درگیسینین ژانویه ساییسین‌دا یئر آلدیغینی و بؤجگین یئنی بیر نؤوع اولاراق ثبت ائدیلدیگینی سؤیله‌یه‌ن اردال زنگین، ایشلرین داوام ائدجگینی سؤیله‌دی.

پروفسور دکتر مقداد دوغانلار ایسه بؤجکله باغلی داها چوخ معلومات الده ائتمک ایسته‌دیگینی سؤیله‌یرک،

"بو آنا قدر یالنیز ۱ نومونه‌سی اله گئچیریله‌ن بؤجگین یارارلی بیر نؤوع مو یوخسا ضررلی بیر نؤوع اولدوغو آپاریلان علمی چالیشمالار نتیجه‌سینده اورتایا چیخاجاق. بسلنمه و چوخالما طرزی ایله باغلی الیمیزده بیلگی یوخدور. دونیادا یئنی بیر نؤوع اولدوغو کسین، بسلندیگی پارازیتلر وارسا توخوملار آراشدیریلمالی، گلن ایل بؤجگین تاپیلدیغی اراضی‌ده چالیشما آپاریلماسی شرط" دئیه دانیشدی.



ایلگیلی‌لی خبرلر