گوندم آنالیز:27

سوریه-ده رژیم قوه‌لری اینقیلابین باشلاندیغی درعا شهرینی هدف گؤتوروب.

گوندم آنالیز:27

سوریه-نین جنوبوندا روسیا و ایرانین دستکلدیگی اسد رژیمی‌نین درعایا ایستیقامت‌لی هوجوم‌لاری داوام ائدیر. سوریه-‌لی موخالیفتین قالالاریندان‌ اولان و سوریه اینقیلابی‌نین باشلاندیغی درعا بؤلگه‌سینه قارشی هوجوم‌لاردا رژیم قوه‌لری جدی قازانج‌لار الده ائتدیکده، سیویل لر اردن ایله اولان سرحد منطقه‌سینه قاچیب سیغیندی. اردن سرحد-کئچید منطقه‌لرینی آچمادی، بونا گؤره ده اردن –سوریه سرحد منطقه‌سینده جدی اینسانی فاجعه یاشانیر. سوریه-لی موخالیفتین رژیم قارشی‌سیندا بیرگه حرکت ائتمه‌مه‌سی و بعضی قروپ‌لارین روسیانین واسیطه چی‌لیگیله رژیم ایله راضی‌لیق الده ائتمه‌سیله موختلیف شهرلر ووروشما‌دان رژیم قوه‌لری‌نین نظارتینه کئچدی. سوریه-نین جنوبونداکی حادثه‌لرین دیگر جهتی ایسه ایسراییل-ایران گرگین‌لیگی‌دیر. ایرانین دستکلدیگی میلیس قروپلاشما‌لاری‌نین ایسراییل سرحدینه یاخینلاشماسی ایکی اؤلکه آراسینداکی گرگین‌لیگی آرتیرا بیلر.

ژوئن آیی‌نین اولینده اسد رژیمی‌نین درعایا بیرباشا عملیات باشلاتماق اوچون حاضرلیق‌لار گؤردوگونه دایر معلومات‌لار سیزدی. سونراکی پروسئسده ایسه رژیمین حربی ساحه‌دکی حاضرلیق‌لاری و بؤلگه‌یه حربی عنصورلار گؤندرمه‌سی عملیاتا ایشاره ائدیردی. درعا بؤلگه‌سینده رژیم و سوریه موخالیفتی آراسیندا کئچن ایللرده جدی قارشیدورما‌لار و محاربه یاشانمادی. نتیجه‌ده روسیا و امریکا بؤلگه ایله علاقه‌لی راضی‌لیق الده ائده‌رک، بؤلگه‌نی گرگین‌لیگی آزالتما بؤلگه‌سی اولا‌راق قبول ائتدی. لاکین رژیمین عملیات‌لار باشلاناجاغی زامان امریکا-لی رسمی‌لرین سوریه-لی موخالیفت قروپ‌لارین لیدئرلرینه گؤندردیک‌لری آچیقلامادا بوتون راضیلاشما‌لار و وعدلره باخمایا‌راق امریکانین روسیا و رژیم قوه‌لری قارشی‌سیندا اونلاری قورومایاجاغی بیلدیریلدی.

درعا بؤلگه‌سینه ایستیقامت‌لی روسیا و اسد رژیمی‌نین هاوا هوجوملاریندان‌ سونرا روسیانین حمیم بازاسیندان درعانین گرگین‌لیگی آزالتما بؤلگه‌سی اولماسینا دایر قرارین لغو ائدیلدیگی باره‌ده آچیقلاما یاییلدی.

درعا بؤلگه‌سی‌نین اوزون مودت‌دیر معین سویه‌ده باریش و دینج‌لیک ایچینده اولماسینا گؤره بؤلگه‌دکی اها‌لی‌نین بؤیوک حیسه‌سی ائو-ائشیگینده یاشاییردی. لاکین روسیا، ایران و اسد رژیمی‌نین درعایا ایستیقامت‌لی عملیات باشلاتماسی و هاوا هوجوم‌لاری حیاتا کئچیرمه‌سیله بؤلگه‌ده جدی کؤچ حرکتی اولدو. 270 مین‌دن چوخ اینسان ائو-ائشیک‌لرینی ترک ائتدی. اونلارین آراسیندا 40 مین سوریه-لی اردن سرحدینه چاتیب، بو اؤلکه‌یه کئچمه‌یه جهد گؤستردیگی بمت طرفین‌دن آچیقلاندی. اردن 650 مین سوریه-لی قاچقینا ائو صاحب‌لیگی ائدیر. بو گون‌لرده ایسه یئنی سوریه-لی قاچقین‌لارا قاپی‌لارینی باغلادی. اردن نه قدر ده سرحدین دیگر طرفین‌دکی سوریه-لیلر اوچون اینسانی یاردیم کامپانیا‌لاری تشکیل ائتسه ده، رژیم قوه‌لری‌نین درعا بؤلگه‌سینده ایره‌لیلمه‌سیندن آسیلی سیویل لر جدی تهلوکه‌یه معروض قالدی. بو چرچیوه‌ده بمت اردن قاپی‌لارینی آچماسی اوچون چاغیریش ائتدی.

حربی اولا‌راق درعا بؤلگه‌سینده روسیا، ایران و اسد رژیم قوه‌لریله سوریه-لی موخالیفت آراسیندا قارشیدورما‌لار داوام ائدیر. رژیم قوه‌لری‌نین چوخ سرعت‌لی شکیلده "لاجات" بؤلگه‌سینی اله کئچیرمه‌سیندن سونرا موختلیف سوریه-لی  موخالیفت قروپ‌لاری روسیانین واسیطه‌چی‌لیگیله رژیم ایله راضی‌لیق الده ائتدی. دائل، بصرى الشام و ایبتا شهرلرینده کی موخالیفت سلاح‌لارینی و شهری رژییم قوه‌لری‌نین نظارتینه تحویل وئردی. دیگر طرف‌دن روسیانین گوج‌لو هاوا دستکی و امریکانین یاردیمینی دایاندیرماسی سلاح‌لی قارشیدورمانی داوام ائتدیرن سوریه-لی موخالیفتی رژیم قوه‌لری قارشی‌سیندا ضعیفلتدی.

سوریه-نین جنوبون‌داکی وضعیت‌دن تأثیرلنن دیگر بیر دؤولت ایسه ایسراییل‌دیر. ایسراییل-ین عملیات‌دان اول روسیا ایله گؤروش‌لر کئچیره‌رک ایرانین و ایران طرفداری میلیس‌لرین عملیاتدا ایشتیراک ائتمه‌مه‌سی باره‌ده راضی‌لیق الده ائتدیگی معلوم‌دور. لاکین ساحه‌دکی وضعیت ایران و ایران طرفداری میلیس‌لرین عملیات‌لاردا ایشتیراک ائتدیگینی اورتایا قویور. ایسراییل-ین دفعه‌لرله ایران و ایران طرفداری قروپلاشما‌لارا قارشی هاوا‌دان هوجوم ائتمه‌سی و ایران طرفداری میلیس‌لرین ایسراییل سرحدینه یاخینلاشماسی ایکی اؤلکه آراسیندا یئنی گرگین‌لیک‌لرین یارانماسینا سبب اولا بیلر.

تورکیه‌نین گوندمینه دایر تحلیل پروقرامی‌نین نوبتی بؤلومونده سیاست، ایقتیصادیات و جمعیت آراشدیرما‌لاری فوندونون امکداشی جان آجونون "سوریه-ده رژیم قوه‌لری اینقیلابین باشلاندیغی درعا شهرینی هدف گؤتوردو" باش‌لیق‌لی آنالیتیک یازی‌سینی تقدیم ائتدیک.



ایلگیلی‌لی خبرلر