تورکیه‌ده توریزم - ۶

هاتوشا، بیر امپراتورلوغون تاریخی عظمتی

تورکیه‌ده توریزم - ۶

هیتی‌لر امپراتورلوغو، میلاددان اؤنجه‌کی دؤورده آنادولودا حؤکم سورموش مدنیتلردن بیری...بو امپراتورلوق عصرلر اول اورتادان قاخمیش، اما باشکندی هاتوشا وارلیغینی داوام ائتدیریر؛ قوناقلارینا زامانین‌دا گؤرکم‌لی و اؤنم‌لی بیر شهر اولدوغونو دئییر.

هیتیت امپراتورلوغونون قورولوشو میلاددان اؤنجه ۱۶۰۰لو ایللره قدر اوزانیر. دؤنمه عاید گیل لوحه‌لردن آنلاشیلدیغی قدری ایله هیتیت اؤلکه‌سی، تاریخ‌ده بیر نؤوع دموکراسی ایله ایداره اولونان ایلک دؤولت ایدی. کرال و کرالیت عائله‌سین‌دن شخصلرین ایداره ائتدیگی اؤلکه‌ده، پانکوش آدی وئریله‌ن مجلیسه هم قرارلاری اویلاما هم ده کرالی دنتله‌مه حاقی وئریلمیشدی.

هیتیلرین گرچکلشدیردیکلرین‌دن بیری ده تاریخین ایلک یازی‌لی آنلاشماسینی یعنی کادئش آنلاشما‌سینی مصر ایله ایمضالامیش اولمالاری... دؤورونون بو ایرلی مدنیتینین باشکندی هاتوشا، آنتیک شهر اولاراق هیتیت ایزلرینی گونوموزه چاتدیریر.

هاتوشا، تورکیه‌نین اورتا قارا دنیز بؤلگه‌سین‌ده چوروم ائلینین سینیرلاری ایچین‌ده. بوگونکو آدی بوغازکؤی. بیر آچیق هاوا آرکئولوژی موزه‌سی قونومونداکی هاتوشا، آشاغی شهر و یوخاری شهر اولماقلا ایکی ساحه‌دن عبارت‌دیر.

آشاغی شهر دئییله‌ن بؤلگه‌ده مولکی یاشاییش ساحه‌لری یئر آلیر و هاتوشانین ان بؤیوک دینی یاپیسی اولان بؤیوک معبد یوکسلیر.

یوخاری شهرده ایسه چوخ ساییدا تاپیناق یئرلشیر و بو بؤلگه، دؤرد قاپی‌سی اولان بیر دووارلا احاطه اولونموش حال‌دا. آسلان‌لی قاپینین ایکی یانینا یئرلشدیریلمیش اولان آسلان یونتولاری هیتیت داش ایشچیلیگینین ان گؤزل نومونه‌لرین‌دن...

هاتوشانین ۲ کیلومتر قوزئی دوغوسونداکی یازیلیکایا معبدی شهرین ان گؤرکم‌لی آچیق هاوا معبدی اولاراق قبول ائدیلیر. ایکی قایا اوتاق‌دان عبارت اولان بو معبدین دووارلاری، هیتیت تانریلاری و تانریچالارینین قابارتمالاری ایله بزدیلمیش.

هاتوشایا سفر ائتمک اوزره چوروما گئتسه‌نیز، چوروم و بوغازکؤی موزه‌لرین‌ده تاریخی بیر سفره چیخمادان، ایسکیلیپ ائلچه‌سینین تاریخی کوچه‌لرینی گؤرمه‌دن، هیتیت یولونو آددیملامادان، چام آغاجی عطرلی یایلالاری گؤرمه‌دن، دولما کیمی یئرلی یئمکلری دادمادان، قارغی‌بئزی، یوللوق کیمی توخومالاردان ساتین آلمادان دؤنمه‌یین.

مصرین گوج‌لو فرعونلارینین ان چتین رقیبی، زامانینین ان بؤیوک سیاسی و حربی گوجو هیتیت باشکندی هاتوشا سیزی گؤزله‌ییر.



ایلگیلی‌لی خبرلر