تۆرکیأنینگ گۆن ترتیبی: آلمانیاداقی ترور قوراماسی NSU

جان آجون؛ سیاسات، ایقدیصادیه‌ت و جمغیت غازناسی- ستا

تۆرکیأنینگ گۆن ترتیبی: آلمانیاداقی ترور قوراماسی NSU

سیاسات، ایقدیصادیه‌ت و جمغیت غازناسی- ستانینگ عیلمی بارلاغچیسی، یازیجی جان آجون ینگ مسئله بۇیونچا سینینی اۇقایارسینگیز:

ترور قوراماسی "ان. اس. او" (NSU) باراداقی قاضیه‌ت ایشی ۵ ییل سۇنگ تاماملانان دا بۇلسا، شپهه لر و نأبِللیلیکلر دۇوام ادیأر. ترور قوراماسی NSU- دان نتیجه چیقارجاقدیغینی اؤنگه سۆرِن آلمان حؤکۆمتینده و جمغیتینده بۇلسا راسیزم و اسلاموفوبیا اؤرأن یایبانگلاشیار.

آلمانیادا ۸ سانیسی تۆرک جِمی ۱۰ آدامی اؤلدۆرمِه‌کده، بانک سۇیماقدا و بمبالی هۆجۆملری قوراماقدا عاییپلانیان ناسیونال سوسیالیست ترور قوراماسی نینگ قاضیه ت ایشی تاماملانیپ باریار. مونیخ ینگ یۇقاری ایالت قاضیه تینده ۵ ییلدان قۇوراق دۇوام ادن قاضیه ت ایشی نینگ اساسی گۆنألیسی بئاته چپه بیلن بیرلیکده قوراما کؤمِک برن ۴ آدام قاضیه ت اؤنگۆنه چیقاریلدی. چپه عؤمۆر بۇیی آزاتلیقدان ماحروم ادیلدی. بیله کی ۴ رایاتا دۆرلی مؤهلِتلرده آزاتلیقدان ماحروم ادیلمه جزاسی بریلدی.

قارالاوچی و آلمانیانینگ حۇوپسوزلیق قوللوقلاری ترور قوراماسی ان اس او نینگ ۳ آدامدان عیباراتدیغینی بیان ادیأر. بئاته چپه بیلن بیرلیکده NSU-نینگ بیله کی آغضالاری اووه بونهارد و اووه ماندلوس ینگ ۲۰۱۱-نجی ییلینگ ۴-نجی نۇیابریندا بانکی سۇیاندان سۇنگ گیزله‌نِن کاراوانیندا اؤلدۆریلمه‌کلری و اۇلارینگ اؤز جانلارینا قاصت ادندیکلری نینگ اؤنگه سۆرۆلمه‌گی کؤپ سانلی شپهه دؤره‌تدی. شیله ده ان اس او باراداقی قاضیه ت ایشی نینگ باش گۆنأکأری بئاته چپه نینگ ان اس او نینگ آغضالاری نینگ اولانان سۇنگقی اؤیۆنی اۇدا برندن بیرنأچه گۆن سۇنگ پلیسا بۇیون اگمه‌گی بو ترور قوراماسی نینگ اساسی قانونی قۇراییش قوراماسی بیلن آراباغلانشیقلی بۇلماغی قاضیه ت ایشی نینگ کأبیر گیزلین تاراپلاری نینگ باردیغی دۇغروسینداقی شۆپهه لری گۆیچلندیریأر. اساسان دا آلمانیا نینگ ایچرکی حۇوپسوزلیق قوللوغی بۇلان اساسی قانونی قۇراییش اداراسی نینگ NSU بیلن باغلی ۱۳۰ دلونی (دۇسیانی- پروندأنی) یۇق اتمه‌گی، ان اس او نینگ آنگیرسینداقی أهلی أهلی حاقیقاتینگ هیچ هاچان یۆزه چیقماجاقدیغینی گؤرکِزیأر. شیله لیکده دگیشلی آقلاوچیلار ترور قوراماسی ان اس او نینگ ۳ آدامدان عیبارت بۇلاندیغینا اینانمایار.

ان اس او ایشی نینگ تاماملانماغینا قارامازدان حۇوپسوزلیق قوللوقلاری نینگ اساسان دا اساسی قانونی قۇراییش قوراماسی نینگ آصلینا سر ادیلنده ان اس او برادا نأمه بیلیأندیگی سۇراغینا جۇغاپ تاپیلمادی.

ترور قوراماسی ان اس او تاراپیندان ادیلن جنایاتلاردان سۇنگ آلمان حۇوپسوزلیق قوللوقلاری ایلکی بیلن اجیر چکنینگ قارینداشلاریندان شۆپهه‌لِنیپدی و راسیست جنایات بۇلما أحتیماللیغینی قابول اتمأندی. آلمان مدیاسی بۇلسا ترور قوراماسی ان اس او نینگ یۆزه چیقماغیندان اۇزال ادیلن جنایاتلاری "دؤنِر جنایاتلاری" حؤکمۆنده حأصیه‌تلندیریپدی.

آلمان حۇوپسوزلیق قوللوقلاری نینگ أهلی ماغلوماتلارا سۇوق- سالا چمه‌لِشمه‌کلری و جنایاتلارینگ آنگیرسیندا راسیست ترور قوراماسی نینگ دوریاندیغی باراداقی أحتیماللیغی اۆنسدن دۆشۆرمه‌گی سبأپلی ترور قوراماسی ان اس او اوزاق ییللارینگ دۇوامیندا جنایاتلارینی دۇوام اتدیردی و جمی ۱۰ آدام پئدا بۇلدی.

ترور قوراماسی ان اس او ایشی نینگ تاماملانماغی بیلن بیرلیکده شۇل بیر واغتدا آلمانیاداقی راسیزمینگ و اسلاموفوبیانینگ یایبانگلاشماغی نینگ گؤرکِزیجیسی بۇلان آشا ساغچی AFD پارتیاسی جمغیتچیلیک سلجریلمه‌لرینه گؤرأ آلمان سیاساتیندا اینگ اولی قۇلداو بریأن ۲-نجی پارتیا درجه سینه گؤرتِریلدی. آ. ف. د نینگ ۲-نجی پارتیا درجه سینه گؤتِریلمه گی بیلن بیرلیکده راسیزمینگ و اسلاموفوبیانینگ آلمان سیاساتیندا هم ده آلمان جمغیتینده اۇرناشاندیغینی آیتماق یالنگیش بۇلماز. اوزاق مؤهلِتدن بأری جمغیتده بار بۇلان داشاری یورتلی دوشمانچیلیغی و اسلام قارشیداشلیغی ایندی AFD بیلن حاص دا مسه مألیم دویولماغا باشلادی.

اِمما دینگه بیر AFD نینگ گۆیچلنمه‌گی دأل، شۇل بیر واغتدا حؤکۆمته شأریک بۇلان هریستیان سوسیالیستلارینگ هم آ اف دی نینگکأ منگزِش توتوم ایه لأپ داشاری یورت دوشمانچیلیغینا و اسلاموفوبیا مچِو بریأن دیسکوسلارا ایه بۇلماغی هم ده ایش آلیپ بارماغی آلمانیانینگ اؤزگِرِندیگینی گؤرکِزیأر. ۲-نجی جاهان اورشوندان بأری آلمان جمغیتینده ایلکینجی گِزِک راسیزم و بِللی بیر دینه قارشی دوشمانچیلیق شیله گۆیچله‌ندی.

آلمان جمغیتی نینگ اؤزگِرِندیگینی گؤرکِزیأن بیله کی بیر گؤرکِزیجی بۇلسا آلمان میللی فوتبال تۇپاری. ۲۰۱۴-نجی ییلدا دۆنیأ قاهرامانی بۇلان آلمان میللی فوتبالی اوزاق ییللارینگ دۇوامیندا انتگراسیون ینگ و کؤپ مدنیتلی یاشاییشینگ اۆستۆنلیگی حؤکمۆنده گؤرۆلیأردی. مسعود اؤزیل، ایلکای گۆن دۇغان، سامی خدیرا، لوکاس پودولسکی، یروم بواتنگ یالی کؤپ سانلی داشاری یورتلاردان گؤچِن ماشغالالارینگ چاغالاری آلمانیا نینگ میللی فوتبال تۇپاری اۆچین دِر دؤکدی. اِمما آلمان میللی فوتبال تۇپاری هم راسیزمدن اؤز نصیبینی آلدی.

ایلکینجی اولی بی آبرایچیلیق AFD نینگ باشلیغی آلکساندر گوالاندینگ "میللت بواتنگ ی قۇنگشولیقدا ایسله مه یأر" دیه‌ن بیاناتی بیلن یۆزه چیقیپدی. ایکینجیسی بۇلسا مسعود اؤزیل و ایلکای گۆن دۇغان ینگ تۆرکیأنینگ جمهورباشلیغی رجب طیب أردۇغان بیلن بریتانیادا صورات آلدیرماغیندان سۇنگ باشدان گچیریلدی. شیله لیکده آلمان میللی فوتبال تۇپاری نینگ روسیادا دۇوام ادیأن دۆنیأ قوبوغیندا تۇپارآرا بأسله شیکده ینگیلمه گی نینگ جۇغاپکأر حؤکمۆنده مسعود اؤزیل ینگ پرزیدنت أردۇغان بیلن آلدیران صوراتی ایغلان ادیلدی.

سیاسات، ایقدیصادیه‌ت و جمغیت غازناسی- ستانینگ عیلمی بارلاغچیسی، یازیجی جان آجون ینگ مسئله بۇیونچا سینینی اۇقادینگیز.



دِگیشلی حابارلار