америка әзәрбәйҗанниму террорлуқ хәвпи бар дөләтләр қатарида көрсәтти

әзәрбәйҗан ташқи ишлар министирлиқи байанатчиси һикмәт һаҗийев американиң әзәрбәйҗанни «террорлуқ хәвпи бар дөләтләр» қатариға киргүзгәнлики тоғрисида йазма байанат елан қилди.

америка әзәрбәйҗанниму террорлуқ хәвпи бар дөләтләр қатарида көрсәтти

түркийә авази радийоси хәвири: әзәрбәйҗан америка ташқи ишлар министирлиқи тәрипидин елан қилинған сайаһәт агаһландуруши тизимликидә, әзәрбәйҗанниң террорлуқ хәвпи бар дөләтләр қатариға киргүзүлгәнликигә һәйран қалғанлиқини билдүрди.

әзәрбәйҗан ташқи ишла министирлиқи байанатчиси һикмәт һаҗийев бу һәқтә елан қилған йазма байанатида, әзәрбәйҗан болуш сүпити билән террорлуқниң барлиқ түрлирини әйибләйдиғанлиқини әскәртти.

һикмәт һаҗийев йеқинқи йиллардин буйан әзәрбәйҗанға кәлгән сайаһәтчиләр саниниң %24 өрлигәнликини, 2017 – йилида 2 милйон 700 миң сайаһәтчини күтүвалғанлиқини әскәртип: «йавропа тәнтәрбийә мусабиқилириға, ислам һәмкарлиқи тәнтәрбийә мусабиқилириға вә формула 1 аптомобил мусабиқилириға саһибханлиқ қилған, америка вә русийә пирезидентлирини күтүвалған, шималий атлантик әһди тәшкилати вә русийәниң йуқири дәриҗилик һәрбий әмәлдарлириниң учришишлириға саһибхан болған әзәрбәйҗан һәққидә, америка ташқи ишлар министирлиқиниң бундақ байанатларни елан қилиши һәқиқәтән һәйран қаларлиқ» деди.

әзәрбәйҗанда муқимлиқ вә җәмийәт аманлиқиниң әң йуқири сәвийәдә кетип барғанлиқини тәкитлигән һикмәт һаҗийев: «әзрәбәйҗан һөкүмити әрменийә ишғал қиливалған земинлардин башқа пүтүн мәмликәт миқйасиниң бихәтәрликини контроллуқи астида тутуп кәлмәктә. әрменийәниң ишғалийитила районниң тинчлиқи вә бихәтәрлики үчүн әң биринчи тәһдит болушни давамлаштурмақта» деди.



مۇناسىۋەتلىك خەۋەرلەر