chawushoghlu: türkiye - amérika munasiwetliri, süriye we iraq weziyiti toghrisida toxtaldi

türkiye jumhuriyiti tashqi ishlar ministiri mewlüt chawushoghlu, amérika qoshma ishtatlirining fethullahchi térrorluq teshkilatigha tutuwatqan pozitsiyesini eyiblidi.

chawushoghlu: türkiye - amérika munasiwetliri, süriye we iraq weziyiti toghrisida toxtaldi

türkiye awazi radiyosi xewiri: mewlüt chawushoghlu amérikining los anzhélés shehiride türkiye puqraliri bilen uchrashqanda söz qilip, «fethullahchi térrorluq teshkilatining qandaq xain teshkilat ikenlikini pütkül dunya chüshendi. inshaallah, amérikimu buni bir küni chüshinip qalar. epsuski biz hazirghiche amérikidin telep qilghan qollashni körelmiduq. qayturup bérish toghrisidiki teleplirimiz emeliyleshmidi, hazirghiche bir tekshürüshmu bashlimidi» dédi.

chawushoghlu türkiye – amérika munasiwetliridiki saqliniwatqan mesililer toghrisida toxtilip mundaq dédi: «amérika qoshma ishtatliri bizning eng muhim ittipaqdashlirimizning biri. bezi mesililerde pikir oxshimasliqimiz we munasiwetlirimizde égiz – peslikler bolushi mumkin, biraq, bu fethullahchi térrorluq teshkilati mesilisi bilen amérikining p y d gha qoral bérishi mesilisi tüpeyli munasiwetlirimizde soghuqchiliq bar. bularnimu diyalog yoli arqiliq hel qilishqa tirishiwatimiz. ikki kündin kéyin wankowérda amérika bilen birlikte ishtirak qilidighan yighinmu koréye urushidin kéyin arimizda ornatqan ittipaqdashliqimizning bir ipadisidur.»

mewlüt chawushoghlu süriyediki özgirishler toghrisida toxtilip, «süriyede ötken yillarda izchil halda qetliamlarning yüz bergenliki toghrisida gep qilattuq, biraq, 2017 – yili bolupmu astana musapisi we tashlighan qedemlirimiz sayisida nöwette süriyening sharaiti xélila yaxshi. pütünley yaxshilandimu, yaq. siyasiy chare tépilmay we süriyede muqimliq ornatmay turup (pütünley yaxshi) bolmaydu. emma, yaxshi terepke qarap kétiwatimiz. siyasiy musapisige merkezleshtuq. türkiye bu yerde bash rolni almaqta» dégenlerni qeyt qildi.

sözi jeryanida iraqning nöwettiki weziyitige alaqidar nuqtilargha isharet qilghan chawushoghlu, «iraqtiki saqliniwatqan mesilining hel qilinishi üchün, her ikki terep bizdin muresseleshtürgüchi bolushimizni telep qilmaqta. rayonluq hökümet éghir xataliq sadir qildi, xataliqini bildi, emma iraqning muqimliqi we chégra pütünlüki bizge nisbeten muhim. mushu ayning 21 – küni baghdadqa barimen. inshaallah, türkiye bu mesilining hel qilinishidimu muhim rol oynaydu. bizning yoshurun pilanimiz yoq, héchkimning zéminida nezirimizmu yoq. biz yaqlaydighan nerse adalet» dep sözlirini axirlashturdi.

ministir chawushoghlu, los anzhéléstiki xizmetlirini axirlashturup, kanadaning wankowér shehiride chaqirilidighan shimaliy koréye témiliq tashqi ishlar ministirliri yighinigha ishtirak qilidu we yighin jeryanida amérika tashqi ishlar ministiri réks tillérson bilen ayrim uchrishish ötküzidu.


خەتكۈچ: fethullahchi , iraq , süriye , amérika , türkiye

مۇناسىۋەتلىك خەۋەرلەر