türk insanperwerlik yardem teshkilatliri

türk insanperwerlik yardem teshkilatlirining yétim – yésirlar üchün ishlewatqan xizmetliri

türk insanperwerlik yardem teshkilatliri

türkiye awazi radiyosi xewiri: bir küni dadisidin ayrilip qalghan bir chongimizning közliride ghem – qayghu alemetlirini körgenidim. sewebini sorighinimizda, özi bilen yashta teng yeni yetmishke yéqinlashqan bir dostining dadisining wapat bolghanliqidin xewer tapqandin kéyin könglining yérim bolghanliqini éytti.  men ichimde, «bu adem bek qérip kétiptu» dégen oygha patqan bir peytte, héliqi chongimiz, «herqandaq bir kishi dadisidin qachan ayrilip qalsa, shu chaghda yétim bolup qalidu, uning közlirige yétimlikning ghéribliqi singip kétidu» dédi hemde bir yétimning haligha yétidighan kishiningmu del yétim ikenlikini sözlirige ilawe qildi.

kéyin men xizmet munasiwiti bilen ziyarette bolghan onlarche dölette köpinchisi kichik balilardin teshkil tapqan qiz - oghul minglarche yétim – yésirlarni uchrattim. hemmisining közide ghem – qayghuning alametlirini kördüm. nöwette men yétim bir bala bilen ata – anisi bar bir balini tamning arqisidinmu ayriwalalaymen. chünki yétimning közliridiki «méning derd – elemlirim nahayiti köp » dep nale qiliwatqan ghem – qayghuni hés qilalaymen.

dunyaning bu jughrapiyesi tarixtin buyan nahayiti köp  derd – elemlerni bashtin kechürdi. bosniye – gértségowinada minglarche nariside bala yétim qaldi. öz waqtida yétim qalghan balilar bügünki künde ottura yashliq insanlardin bolup qaldi. emma derd – elemler héch untulmidi. nöwette süriyedinmu minglarche nariside yétim balilar pütkül dunyagha bolupmu türkiyege we rayon döletlirige amanet qaldi. bularla emes, afriqida dawamlishiwatqan ichki urush, birmidiki qirghinchiliq, ukrainadiki toqunushlar, rusiye – chéchiniye urushi yene bizge minglarche yétim balilarni amanet qaldurdi. peqet urushlarla emes, tebiiy apetlermu yer yüzide yétim balilarning sanini köpeytmekte.

türkiyede chong – kichiq onlarche insanperwerlik yardem teshkilatliri bar bolup, hemmisi oxshashla muhtajlargha yardem bermekte. qeyerde birer insan derd – elemge muptila bolup qalghan bolsa, derhal shu yerge yétip bérip, bu derd – elemni bir qacha ash, bir qur kiyim – kéchek, bir chédir, bir ediyal bilen bolsimu hel qilishqa tirishmaqta. biraq bu teshkilatlar mutexessisleshken bolsa téximu yaxshi bolatti. biri peqet turalghu – jay mesiliside, biri yémek - ichmek xizmitide, biri pisxologiyelik yardem bérishte, yene biri yétim – yésirlar mesiliside mutexessisleshken bolsa bek yaxshi bolatti. pütün küchi bilen özi mutexessisleshken sahede xizmet ishlise ünümi téximu yaxshi bolatti...

bu yerde, yéqinqi yillardin buyan insanperwerlik yardem paaliyetlirini mislisiz derijide köpeytip, derdmenlerning derdige derman boluwatqan xelqara insanperwerlik yardem fondi jemiyiti toghriliqmu azraq toxtilip ötüshke toghra kélidu. jemiyet yéqinqi 6 aydin buyan türkiyediki yétim – yésirlar üchünla emes, pütkül dunyadiki yétim – yésirlar üchünmu muhim bir layiheni ishqa kirishtürmekte.

xelqara insanperwerlik yardem fondi jemiyitining altinchi nöwetlik «yétim – yésirlar hemkarliq küni» dep atalghan paaliyetliri bu yil ishqa ashurulmaqta. bu paaliyetlerdimu burkina fasodin filippinghiche, bosniye – gértségowinadin birmighiche 45 dölet ziyaret qilinmaqta. ziyaret qilinghan döletlerde 204 mingdin artuq yétim – yésirgha insanperwerlik yardem qoli sunulmaqta. 1 – mart küni bashlanghan paaliyetler  31 – mayghiche dawamlishidu. bu yil biri türkiyede süriyelik yétim balilar üchün, 3 i bangladéshta, yene biri taylandta bolup, jemiy 5 yétimxana xizmetke kirishtürülidu.

xelqara insanperwerlik yardem fondi jemiyiti mesulliri 12 minggha yéqini türkiyede bolup, jemiy 52 dölette 80 ming yétim balini üzlüksiz baghrigha bésiwatqanliqlirini tekitlimekte. jemiyet 100 din artuq dölette 800 minggha yéqin yétim baligha atidarchiliq qilmaqta.

jemiyet mesulliri yéqinda almutada bir yétimxanini ziyaret qildi. minglarche kilométirliq yiraq musapidin ulargha kiyim – kéchek, qeghez – qelem, yémek - ichmek qatarliq hediyelerni alghach bardi. hediyelerni tarqitish murasimidin kéyin hés – tuyghulirini izhar qilghan aysana isimlik balining munu sözliri jemiyetning xizmetlirining ne qeder muhimliqini chüshendürüp bermekte: «bu yerdiki 70 qérindishim namidin silerge köptin köp  rehmet éytimen. bizge nisbeten eng yaxshi hediye silerning bizni untup qalmasliqinglardur. qolunglar quruq kelgen bolsanglarmu bizni adettin tashqiri derijide xursen qilghan bolattinglar. bizni untup qalmanglar, bu biz üchün yéterliktur.»

 



مۇناسىۋەتلىك خەۋەرلەر